روح زوجتى 17

عادل واقف لابس لبس خاص بالمشرحة وواقف جمب الدكتور قدام جثة العسكري وبيفتكر اللي حصل لما وقعو جوا الشقة
وقع عادل والعساكر اللي معاه قدام حاجة واقفة وبتبص بخوف و كانت بتصرخ كان جسم مجمد قام عادل ووقف قدامو ولمس ايدو راحت وقعت واتكسرت ف الارض كل واحد من العساكر صرخو وجريو علي برا وعادل واقف مذهول من اللي شايفو فضل واقف مش عارف يعمل ايه وف لحظة رفع موبايلو واتصل علي دكتور ف المشرحة وقالو علي اللي شايفو قدامو
وكان رد الدكتور انو يجيبو دفاية لازم الجسم ده يدفي لانو ف خلال 15 دقيقة هيتكسر ويقع علي الارض
اصدر عادل اوامرو بان العساكر تجيب دفيات بسرعة وفى خلال دقايق كان الجسم ده محاط باكتر من دفاية شغالة علي اعلي درجة ليها لحد ما بدا الجسم يدفي وقبل ما يقع علي الارض كان عادل مسكو بس للاسف فقد بعض الاجزاء البسيطة
رجع عادل للواقع علي صوت الدكتور
الدكتور(بشك) : انت متاكد يا عادل ان العسكري ده كان بيصرخ وانتو بتكسرو ف الباب
عادل (بثقة): ايوة واثق انا بنفسي كنت بكسر ف الباب مع العساكر وف لحظة اللي وقعنا فيها علي الارض كان الصوت اختفي
الدكتور(بشئ من العصبية): مستحيل يا عادل اللي انت بتقولو
عادل(بشك): ليه ؟
الدكتور: لانو عشان الجسم ده يوصل للحالة دى لازم يكون ف جو يكون كلو تلج ومش كده وبس ده لازم يكون ف الموقف ده لفترة طويلة جدا عشان يوصل ان كل خلية ف جسمو تتجمد وتتكسر زى الازاز زى اللي انت شوفتو
عادل(بصدمة): تقصد ايه بكلامك
الدكتور: اقصد انك قدام حاجة غير طبيعية .... انا مصدقك ان العسكري كان بيصرخ وانت بتكسر الباب ولما دخلت كان اتجمد ...ده مش انسان يا عادل
ف اللحظة دى كان في كلمات بدات تتردد ف عقل عادل
" من كتر حبو ليها ده بقي بيتخيل روحها ف الشقة وحكلنا" " من كتر حبو ليها ده بقي بيتخيل روحها ف الشقة وحكلنا"
افتكر عادل كلام احمد لما حاول يدخل الشقة يوم ما طلع من السجن
احمد(بعصبية ): طيب طيب مش هدخلها بس محدش يدخل الشقة محدش يدخلها
عادل (بنفاذ صبر): محدش بيدخل الشقة غير اللي بيدورو علي ادلة ومحدش بيدخل لواحدو متخفش علي اي حاجة ف الشقة
يومها عادل مفهمش قصد احمد من اللي كان بيقولو كان بيحسبو خايف علي اللي ف الشقة طلع خايف علي اللي بيدخلها ...استاذن عادل من الدكتور ان وراه حاجة مهمة لازم يعملها
عادل(مع نفسو): الحل ف ايد احمد
عند بيت ريهام كان احمد رجع من الشغل واول ما دخل الشقة سلم علي سوسن ودخل اوضة احلام لاقيها صاحية بتضحكلو ...افتكر شبيه ريهام بس رجع للواقع وبص للراديو اللي مش بيقفلو وهو شغال علي القران علي طول
احمد(بهمس): مش هتقربلك ...انا معاكى علي طول ... طول ما انا عايش محدش هيقدر يلمس شعرة منك
وقرب من احلام وباسها بحنية وخرج من الاوضة لاقي سوسن بتضحكلو
سوسن (بفرحة): انا فرحانة اوى انك قاعد معانا انت واحلام
ابتسم احمد ابتسامة هادية
احمد: وانا اكتر يا ماما
بص احمد ف الشقة ورجع بص لسوسن
احمد(بهدوء): هو بابا ورامز بيختفو كل يوم ليه ؟
سوسن(بهدوء): بيزورو دينا ف المستشفي بيطمنو عليها
احمد(باهتمام): وهى عاملة ايه دلوقتى ؟؟؟
سوسن(بهدوء): بدات تتحسن بس موضوع محمود ماثر عليها
احمد(بحزن): ربنا يعينها ... عن اذنك يا ماما هدخل الاوضة شوية
لف احمد وراح علي الاوضة وقبل ما يفتح الباب
سوسن(بهدوء): احطلك الاكل ولا هتستنى ناكل كلنا مع بعض
لف احمد وهو راسم شبح ابتسامة علي وشو
احمد(بهدوء): لا يا ماما هستنى ناكل كلنا مع بعض
سوسن(بهدوء): طيب يا بنى ادخل ارتاحلك شوية لحد ما يرجعو
دخل احمد الاوضة وهو حاسس انو السبب ف اللي حصل لمحمود وانو اللي حرم دينا من جوزها وبدا يسال نفسو ليه ريهام عملت كده ف محمود ... ايه اللي محمود عملو عشان ريهام تقتلو ... كان قادر يسالها بس هو ممنوع من دخول الشقة ...واثناء تصارع الافكار دى ف عقل احمد رن جرس الباب باستمرار
سوسن: حاضر حاضر
وصلت عند الباب وفتحتو بس ملاقتش حد بصت باستغراب وهزت كتفها علي انو حد بيعاكس ولسه هتقفل الباب .... نط قدامها رامز وهو بيصرخ اترعبت سوسن وصرخت وفضلت تضربو بالفوطة اللي ف ايدها
وخرج احمد علي الصوت ده وهو مبتسم من تصرفات رامز الطفوليه
احمد ( بهدوء ):مش هتبطل حركاتك دى
رامز (مبتسم): ابدا ... لانى لو بطلتها مبقاش رامز
لف رامز واحمد عشان يكملو كلامهم ف الاوضة بس سوسن وقفت رامز
سوسن(بهدوء): امال فين ابوك ؟
رامز: قالي هيروح يصرف المعاش بتاعو عشان يجيب طلبات البيت
دخل رامز واحمد الاوضة....... ولفت سوسن عشان تقفل الباب وترجع تكمل شغلها بس حد حط ايدو علي الباب عشان مش يتقفل .. بصت سوسن من ورا الباب لاقتو شكل مش غريب عليها و فى لحظات افتكرت مين ده ... فتحت الباب وفضلت ساكتة شوية للشخص المبتسم قدامها
سوسن(بقلق): في حاجة يا باشا؟؟
عادل (مبتسم): مش هتقوليلي اتفضل الاول
سوسن(بتردد): اتفضل
دخل عادل وهو بيبص ف الشقة وهو بيدور علي احمد ورجع لف علي سوسن وهو مبتسم
عادل: احمد هنا ؟
سوسن(بقلق): اه ... بس مش هو برئ من اللي حصل
ضحك عادل ضحكة خفيفة لانو عرف سبب سؤال سوسن
عادل: متخفيش يا حجة انا جاي اتكلم مع احمد مش جاي اخدو
اطمنت سوسن لعادل وابتسمت ف هدوء
سوسن : تتغدى معانا ؟؟؟
ابتسم عادل
عادل:امممم طيب بس عايز اتكلم مع احمد شوية علي انفراد
سوسن(مبتسمة): طيب اتفضل هنا وانا هقولو
ابتسم عادل وقعد ف المكان اللي شاورت عليه سوسن ... لفت سوسن وراحت عند باب الاوضة وخبطت عليه لحد ما قام رامز وفتح الباب وهو واقف قدامو
رامز(مبتسم): عايزة ايه يا سوسو؟
سوسن (بمقاومة): وسع كده يا واد عايزة ادخل
رمز(مبتسم) : لالالالا يا سوسو دى قعده عرب مينفعش بيقي فيها نساء
قام احمد شدو من علي الباب
احمد : ادخلي يا ماما
سوسن : تعالي الظابط اللي ماسك قضية محمود هنا وعايز يتكلم معاك
واقف احمد للحظات جامد مبيتحركش ... حست سوسن انو خايف انو ياخدو معاه
سوسن: متخفش هو قالي انو عايز يتكلم معاك بس
اترسمت شبح ابتسامة علي وش احمد وهز راسو ... سوسن مشيت واخدت رامز معاها لانها عارفة ان احمد مش هيعرف يتكلم مع الظابط ورامز موجود... وخرجت برا وشاورت لعادل علي اوضة احمد....ابتسم عادل وقام شكرها وراح للاوضة اللي احمد مستنيه قدامها
دخل احمد ومعاه عادل وقعد لحظات من الصمت قاتلة
عادل(بهدوء) : اخبار احلام ايه ؟
احمد(بتوتر): كويسة الحمد لله
عادل : انا مبعرفش الف وادور وهتكلم علي طول ف اللي جاي عشانو
انتبه احمد لكلام عادل
عادل(بجدية) : مين اللي قتل محمود يا احمد؟