الجمعة، 28 مارس 2014

امواج الدنيا

0 التعليقات

 -      الدنيا عاملة زى البحر , موجه كبيرة وموجه صغيرة 
-      لازم نتشجع ونواجه كل موجه , عشان متوقعناش 
-      في بعض الاحيان بتكون الموجه اكبر مننا وبتوقعنا 
-      بس لو مقومناش بسرعة هتيجى موجه تانيه تغرقنا 
-      عشان نواجه كل موجه مهما كان حجمها 
-      لازم نكون واقفين علي ارض ثابته مش متحركه 
-      ولو حصل ان الارض اللي واقفين عليها اختفت من تحتنا 
-      لازم نكون عارفين العوم عشان منغرقش 
-      لكل واحد فينا مبادئ وافكار تقاليد وعادات 
-      في بعض الاحيان ممكن يكتشف ان بعض منها لازم يتصحح 
-      والا  وهو بيواجه الموجه الارض هتختفي من تحته وهيقع والموجه هتغرقه 
-      ولو حصل ده لازم يكون عنده شئ يساعده عشان ميغرقش
-      لما بنعرف نتفادى موجه بنتشجع لتفادى الموجه اللي بعدها مهما كان حجمها
-      ولو في موجه وقعتنا بتخلينا ازاي نعرف نواجه ونتفادى اللي بعدها 
مع تحياتى :
هـــــــــيـــــــــــام ســـــــــالـــــــــــم
أكمل التدوينه

الأربعاء، 19 مارس 2014

الشخص المناسب في المكان المناسب

0 التعليقات

الرجل المناسب في المكان المناسب جملة كتير بنسمعها
بس اعتقد اننا مشوفنهاش في الواقع  , لاننا بنتعمد ديما نحط الشخص غير مناسب  في اي مكان ,, كتير اوى بلاحظ ان الموضوع ده بيعتمد  في بعض الاحيان
-      علي الواسطة
الشخص يطلع من الكليه يشتغل علي طول ويضيع فرصة انسان اجتهد
وشغله احسن منه بكتير وليه خبيرة
-      افكار المجتمع العقيمة اللي  مش بتودى ولا بتجيب
لاننا في مجتمع بيحب المنظرة والمكانة الاجتماعية  , بقت كلمة دكتور , مهندس , صيدلي , اهم مصطلحات
-      لدرجة لو سالت اطفال في الحضانة نفسكم تطلعوا ايه
هتلاقي 99 % منهم بيقولك دكتور ومهندس
من كتر ما الطفل بيسمع في البيت  , ذاكر عشان تطلع دكتور
عشان الناس تحترمك
-       وكأن الاحترام بيجى من المهنة مش الاخلاق والتربية  اللي اترباها الطفل , وبالتالي بيقتل المهوبة والتفكير داخل الطفل , وازاي يتخذ القرارات
-       فبيطلع نسبه كتيرة من المجتمع دكاترة ومهندسيين , صيادلة , بدون ما يكونو عايزين المهنة دى
-       دخلو الجامعة ودرسوا سنيين في مجال معين بس عشان اهلهم عايزينهم يطلعو كده ,, وعشان يبقي احسن من ابن خالته او ابن عمته , وعشان البنت تتجوز وتتخطب لواحد مركزه عالي وتكون احسن من بنت عمتها وبنت خالتها
-       فدخلنا المصالح الشخصية  في مهنة المفروض انها اصلا بتبنى بلد  وبتخلي البلد دى تتقدم
-       عشان كده بقينا نسمع :
انا روحت لدكتور مشهور ودفعت كشف(  قد كده ) وروحت صرفت فلوس علي ادوية كتبهالي برضه (قد كده ) وفي الاخر مفيش نتيجة
وسمعت عن دكتور تانى مش مشهور اوى وروحتله وكشفه كويس وكتبلي دوا وجاب نتيجة كويسه
-       ليــــــــــــــــــــــــــــــــــــــــــــــــــــــــــه؟؟؟  عارفيـــــــــــــــــــــــــــن ليـــــــــــــــــــه..
لان انتو السبب
ده شخص دخل كليه مش عايزها بالتالي مش هيبدع فيها لانه مش بيحبها
بالنسبه ليه مجرد شغل بيجيب فلوس فقط
ف انتى او هو مش مهميين عنده
عشان كده بنسمع دكتور نسي فوطة في بطن العيان وقت العمليه
ونسمع كوارث عمليات اتعملت غلط وودت اصحابها في داهيه
...
-       اما التانى ف ده شخص داخل الكليه دى عشان بيحب المهنة دى ف اكيد هيهتم بيكى وهيحافظ عليكى
-       مش هيبقي اختيار دكتور تروحى ليه تكشفي مغامرة بالنسبه ليكى
ولا كل واحد عايز يعمل عمليه يروح يسال مليون مرة علي الدكتور
عشان خايف بدل ما يدخل يعمل عمليه عشان يرتاج من تعب يطلع بعاهة
-       ياجماعة لو كل ام واب سابو ابنهم او بنتهم تكتشف هوايتها وموهبتها بنفسها اهتموا بيها ونموا الموهبه دي ليهم , صدقونى هيكون ليهم مكانه مهمة في المجتمع لانهم دخلو مجال هم بيحبوه فكل فترة هيطوروا من نفسهم , وهيكسبوا برضو
-       لكن لما يكون عندنا  اغلبيه شعب مصر دكاترة مهندسيين  ايا كان الوظيفة , اكيد هنلاقي عجز في التوظيف وبطالة
-       لكن لو كل واحد اخد مكانه الطبيعى مش كنا هنبقي كده
-       وبلاش استحقار الوظيفة اللي بقي عاده في شعب مصر , لان كل وظيفة ليها اهميه ,, النجار لو مش موجود مش هتلاقي اللي يعملك اثاث بيتك ,, وغييره من الوظايف اللي لاقيت شعب مصر بيبص ليها باستحقار 
-       طالما انها مهنة شريفة  مينفعش نبصلها بالطريقة دى
ولو عايزين تعرفو اهميتها
-       اتخيلو البلد بدون اصحاب المهنة دى وشوفو هتعيشو ازاي
مع تحياتى :

هـــــــيــــــــام ســـــــالـــــــم
أكمل التدوينه

الأربعاء، 5 مارس 2014

السجان والمسجون

0 التعليقات

متكونش المسجون والسجان , والحاكم والمحكوم عليه , بسبب انك فقدت الامل 

لما تقع متفضلش قاعد ,, لا قوم اقف من تانى وامشي خطوة خطوة لحد ما تجري 
مش تحبس نفسك بنفسك لانك وقتها قصاد حلم واحد ضاع منك , هتضع فرص كتير واحلام كتير اوى ,, هترجع تندم عليها 
فبتكون انت الحاكم اللي حكم علي نفسو بالسجن 
وبقيت الحاكم والحكوم عليه و المسجون و السجان 
خد من اللي حصل دفعة ايجابية لنفسك واتعلم من اللي حصل 
واستخدمو عشان ترتفع لفوق مش تنزل لتحت 
مع تحياتى :

هيام سالم
أكمل التدوينه

الاثنين، 3 مارس 2014

انا عصفورة

2 التعليقات

- انا عصفورة ,, معروفة انا بالتشبيه ده 

لانى بحب الانطلاق والحريه , طالما التصرف اللي بعملو مش عيب ولا حرام , ف مش بهتم بكلام الناس 
- كتير عملت حاجات عصبت اهلي منى ^_^ 
- فى مجتمعنا الشرقي بقينا محبوسيين في قفص اسمو (العادات والتقاليد) ,, مش كده وبس ده كمان بقينا مقيديين بسلسله اسمها ( كلام الناس )
- بقينا بنتحرم  من حاجة نفسنا نعملها بسبب ان الناس هتتكلم علينا وهى اصلا مش حاجة حرام ,
وبقينا بنخاف من كلمة (ازاي تعمل كده؟؟) و ( يصح وميصحش )
- لحد ما نكبر ونبدا نندم اننا مش عرفنا نعيش كل فترة في عمرنا العيشه الصحيحة , وحرمنا نفسنا بسبب كلام الناس 
امثلة 

- زى ما ادخل بيت صغير الاقي العفش فيه اكبر منو ومش مخلي حد يعرف يتحرك ,, وده ليه ؟
لان العروسة خايفة من كلام الناس انهم يقولو العريس مجبلهاش , وعفشها مش كويس , ووو... الخ
 بس بتتبهدل في بيتها ومش عارفة تاخد راحتها في الحركة (وكلام الناس منفعهاش)
- لما بنت عروسة تتبهدل وتتعامل اسوء معاملة من اهل جوزها بسبب تاخر حملها 
تعيش كابوس كل يوم , وتسمع كلام ملوش لازمة 
انتم مالكم وملها (دى حاجة من عند ربنا )(لا هم استفادو ولا هى استفادت حاجة كل اللي حصل انها بقت بتكره وجودهم في حياتها وممكن تحصل مشاكل بينها وبين جوزها بسببهم وغير الحالة النفسية اللي هى فيها )
  
- زى عيله ممكن تجوز بنتها لواحد للمجرد انو معاه فلوس وبيت ,,, ونسيت الشخص ده هيحترمها ولا لا 
ممكن يكون علي قد من الاخلاق (بس البنت مش حاسة بقبول ,, يبقي وقتها هى بتحب و صغيرة ومش فاهمة )
-زى بنت لما يتاخر جوزاها ,,, نسيو ان الجواز قسمة ونصيب وان ليه معاد محدد , ربنا محدده ,,, غير كده البنت بتعيش اسوء ايام حياتها من اللي هتسمعو (شدي حيلك ... نفسي افهم تشد حيلها تعمل ايه يعنى ؟؟؟؟ تمسك لوحة وتعلقها وتمشي في الشارع تقول عريس ياولاد الحلال )
- عيب البنت تركب عجلة (نفسي افهم ايه العيب فى كده )
-لو شوفنا واحد بيجري في الشارع الناس تضحك عليه 
(طيب فهمونى ,, انتوا بتضحكو علي ايه ؟؟؟ يعنى هو عمل  ايه يضحك ؟؟؟)
........................
<< من هنا بستنتج >>

ان حنا في مجتمع 
فااااااااااااااشل بمعنى الكلمة 
لازم كل واحد يخليه فنفسو وملوش دعوة بغيرو غير في حالة الغلط (الغلطات المتعارف عليها العالم كلو ودين الاسلام, وقتها انصحو )غير كده خليك فى نفسك 
لان في يوم هيجى وحصل فيك زى ما بتعمل 
و يضحك عليك , و تسمع كلام ملوش لازمة علي حاجة انت عملتها ومش غلط 
عشان كده , بيقولو عليا عصفورة 
لانى مش بهتم بكلام الناس طالما بعمل كل حاجة صح 
وملتزمة بدينى 
واللي بيضحك ,, انا بضحك برضو بس علي عقلو الصغير 
انا عصفورة ميفعش اكون في قفص من حديد ولا مقيده بسلسلة 
اصرخ من احباطى بس اللي حبسونى بيسمعوها علي انها تغريده ليا 
صنعو من احباطى تغريده تضحكهم 
انا ضد الاسلوب ده 
انا عصفورة ^_^ مش انا لواحدى 
كل واحد فينا عصفورة 
لازم تستمتعو بالحياه في حدود الدين ومش تحرمو نفسكم من حاجة ,, بسبب كلام الناس 
لانه لا هيقدم ولا هياخر 
مع تحياتى :
هـــيـــام ســـالـــم
أكمل التدوينه

الأحد، 2 مارس 2014

لا تنخدع بالمظاهر (سوء ظن )

0 التعليقات

صعدت الي المسرح , اظلم المكان لا يوجد غير بقعة

 ضوء وهى بمنتصفها 


صوت تصفيق حار , وترحيب من الجمهور ,
وابتسامات حاضرة 

واستعداد كل فرد من الجالسيين للضحك حتى يتوقف

 قلبه 

ابتسامتها المشرقة و حديثها الشيق , جذبت 

الجمهور اليها فاحبوها 

اما اليوم , فكانت ابتسامها باهتة تخفي الالام

 التى بداخلها وتخفت وراء قناع الابتسامة 

لكن لم يشعر بها احد , لقد ظنو انها فقرة مما 

ستقدمه اليوم لاضحاكهم

 
نظرت اليهم , ادارت عيناها في المكان , حتى 

صمتها جعلهم يضحكون
 
تذكرت قصة المهرج عندما صعد الي المسرح يبكى 

عندما توفي ولده وضحك الجمهور

 
اغمضت عيناها للحظات , فتحت عينها مرة اخري وبهما لمعة ,ابتسامة مشرقة مرة اخري وابتدت فقرتها 
في ذلك اليوم ضحك الجمهور كثيرا , حتى انهم اجمعوا ان تلك المرة هى اكثر تميزا عن سابقاتها 
......................................
في محيط المجتمع اللي بنعيش فيه , والاشخاص اللي بنتعامل معاهم 
بيظهر جانب واحد او 2 من شخصيتنا , اللي هو الجانب المسيطر 
وقتها بيتعود الناس علي الجانب ده 
وبيرفضو فكرة ان الشخص ده ليه جوانب تانيه 
فلو اتصرف تصرف غير اللي اتعودو عليه بيكون اتغير
زى الشخص المبتسم ديما واللي بيضحك 
اتعود الناس انهم يشوفوه بيضحك 
فلو حصل حاجة توجعوا وظهر عليه كده 
يبقي اتغير ومبقاش زى زمان 
من الاخر عشان تتجنب كلام الناس وظنهم انك اتغيرت 
اظهر جوانب شخصيتك كلها قدامهم 
تجنب تماما انك تظهر جانب واحد من شخصيتك 
لحسن تكون زى المهرج , في عز وجعو كانت الناس بتضحك عليه 
عشان اتعودت ديما ان المهرج بيضحك , ف اي حاجة منه هتكون بتضحك 
وفي الاخر بتكون انت الغلطان انك اظهرت جانب هم مش اتعودو عليه 
وهم في الاخر بيكونو المظلومين
مع تحياتى :
هـــيـــام ســـالـــم


أكمل التدوينه
هذا القالب من تصميم ياسو صاحب مدونة نصائح للمدونين